పాఠశాలల పర్యవేక్షణకు రెగ్యులర్ అధికారులనే నియమించాలి: – డిటిఎఫ్ డిమాండ్

మండల యాదగిరి, స్వర్ణోదయం ప్రతినిధి ​హుజురాబాద్, నవంబర్ 8, 2025:
​ప్రభుత్వ పాఠశాలల్లో విద్యా ప్రమాణాల పర్యవేక్షణ కోసం ఉపాధ్యాయులతో కమిటీలు వేయడాన్ని నిరసిస్తూ, డెమొక్రటిక్ టీచర్స్ ఫెడరేషన్ (డిటిఎఫ్) ప్రభుత్వాన్ని కీలక డిమాండ్ చేసింది. సర్వీస్ రూల్స్ సమస్యను పరిష్కరించి, కేవలం మండల, ఉప విద్యాధికారుల (ఎంఈఓలు, డీఈఓలు) వంటి రెగ్యులర్ అధికారుల ద్వారానే పాఠశాలల్లో బోధనాభ్యసన కార్యక్రమాలను పర్యవేక్షించాలని ఆ సంఘం కోరింది. టీచర్లతో కమిటీలు వేసి, వారికి అదనపు భారం మోపడం వల్ల వారి విద్యా బోధనకు ఆటంకం కలుగుతుందని డిటిఎఫ్ రాష్ట్ర పూర్వ అధ్యక్షులు, తెలంగాణ రాష్ట్ర విద్యా పరిరక్షణ కమిటీ సహ-ప్రధాన కార్యదర్శి ఎం.రఘుశంకర్ రెడ్డి స్పష్టం చేశారు.
​నేడు హుజురాబాద్‌ బాలికల ఉన్నత పాఠశాలలో డిటిఎఫ్ కరీంనగర్ జిల్లా కమిటీ సమావేశం జిల్లా అధ్యక్షులు ఆవాల నరహరి అధ్యక్షతన జరిగింది. ముఖ్య అతిథిగా పాల్గొన్న రఘుశంకర్ రెడ్డి మాట్లాడుతూ, గత రెండేళ్లుగా విద్యాభివృద్ధి గురించి ప్రభుత్వం చెబుతున్నా, నిధుల కేటాయింపు నామమాత్రంగానే ఉందని ఆవేదన వ్యక్తం చేశారు. ప్రభుత్వ బడుల్లో విద్యార్థుల సంఖ్య తగ్గుతోందని, కార్పొరేట్ విద్యా సంస్థలపై ప్రభుత్వానికి నియంత్రణ కొరవడిందని అన్నారు. ప్రభుత్వ విద్యకు అధిక నిధులు కేటాయించి, కార్పొరేట్ రంగాన్ని అదుపు చేయడం ద్వారా సామాజిక అసమానతలు పెరగకుండా చూడాలని ఆయన కోరారు.
​అదేవిధంగా రాష్ట్ర ఆడిట్ కమిటీ కన్వీనర్ పల్కల ఈశ్వర్ రెడ్డి మాట్లాడుతూ.. ఎస్సీఈఆర్టీ, విద్యా సంచాలకులు, ఎస్ఎస్‌ఏ అధికారుల మధ్య సమన్వయం లేకపోవడం వల్ల బోధనేతర కార్యక్రమాల భారం పెరిగి, బోధనకు ఆటంకం కలుగుతోందని తెలిపారు. అన్ని స్థాయిల అధికారుల సమన్వయంతో, అమలుకు వీలుగా ఉండే కార్యక్రమాలను మాత్రమే అందించాలని కోరారు.
​జిల్లా అధ్యక్షులు ఆవాల నరహరి పెండింగ్‌లో ఉన్న డీఏలు వెంటనే విడుదల చేయాలని, పీఆర్సీని అమలు చేయాలని ప్రభుత్వాన్ని కోరగా, జిల్లా ప్రధాన కార్యదర్శి చకినాల రాంమోహన్ మాట్లాడుతూ, విద్యాశాఖలోని వివిధ యాప్‌లు, ఆన్‌లైన్ డేటా నమోదు వల్ల బోధనకు అంతరాయం ఏర్పడుతోందని, వీటిని తగ్గించి, బోధనా సమయాన్ని పెంచాలని విజ్ఞప్తి చేశారు.
​ఈ సమావేశంలో డిటిఎఫ్ రాష్ట్ర పూర్వ అధ్యక్షులు కె. నారాయణ రెడ్డి, జిల్లా కమిటీ సభ్యులు ఏ. దామోదర్, తాళ్ళపల్లి తిరుపతి, చక్రధర్, బి.రమేష్ సహా పలువురు రాష్ట్ర, జిల్లా నాయకులు పాల్గొన్నారు.

మాట్లాడుతున్న డిటిఎఫ్ రాష్ట్ర పూర్వ అధ్యక్షులు, తెలంగాణ రాష్ట్ర విద్యా పరిరక్షణ కమిటీ సహ-ప్రధాన కార్యదర్శి ఎం.రఘుశంకర్ రెడ్డి