కలంపై పోలీసుల జులుం తగదు. – బాధ్యులైన పోలీసులపై చర్యలు తీసుకోవాలి.. -మాదిగ జర్నలిస్టు ఫోరం జిల్లా ఉపాధ్యక్షుడు టేకుల సాగర్ డిమాండ్

మండల యాదగిరి, స్వర్ణోదయం ప్రతినిధి హుజురాబాద్ : జర్నలిస్టులపై దాడులు, పోలీసుల వేధింపులు అప్రజాస్వామికమని, వార్తలు రాసిన జర్నలిస్టులపై థర్డ్ డిగ్రీ ప్రయోగించిన పోలీసులపై కఠిన చర్యలు తీసుకోవాలని మాదిగ జర్నలిస్టు ఫోరం జిల్లా ఉపాధ్యక్షుడు టేకుల సాగర్ డిమాండ్ చేశారు.
గంభీరావుపేట ఎస్సై వ్యవహార శైలిపై వార్తలు రాసిన ఏక్ దమ్ న్యూస్ జర్నలిస్టు సంపత్, ఎడిటర్ పొత్తూరి శేఖర్‌లను విచక్షణారహితంగా కొట్టి, థర్డ్ డిగ్రీ ప్రయోగించారన్న ఆరోపణలపై ఆయన తీవ్ర ఆగ్రహం వ్యక్తం చేశారు. ప్రజా సమస్యలను వెలుగులోకి తెచ్చే జర్నలిస్టులపై దాడులకు పాల్పడటం ప్రజాస్వామ్య విలువలకు విరుద్ధమని పేర్కొన్నారు. వార్తలు రాసినందుకు జర్నలిస్టులను వేధించడం భావప్రకటనా స్వేచ్ఛను హరించడమేనని అన్నారు. ఈ ఘటనపై ఉన్నతాధికారులు సమగ్ర విచారణ జరిపి, బాధ్యులైన పోలీసు అధికారులపై తక్షణమే చర్యలు తీసుకోవాలని డిమాండ్ చేశారు.
జర్నలిస్టులకు న్యాయం జరిగే వరకు మాదిగ జర్నలిస్టు ఫోరం అండగా నిలుస్తుందని, బాధ్యులైన పోలీసులపై చర్యలు తీసుకోకపోతే ఫోరం ఆధ్వర్యంలో ఆందోళన కార్యక్రమాలు చేపడతామని ఆయన హెచ్చరించారు.