ఓటు చోరీ-ప్రజాస్వామ్యం ఖూనీ.. సిఇసి జ్ఞానేశ్ కుమార్‌ను వెంటనే తొలగించాలి : AIKMS ధర్నా

మండల యాదగిరి, స్వర్ణోదయ ప్రతినిధి కరీంనగర్ (పెద్దపల్లి): “ఓటు చోరీ ద్వారా ప్రజాస్వామ్యాన్ని ఖూనీ చేస్తున్నారు.. భారత ప్రధాన ఎన్నికల కమిషనర్ (సి.ఇ.సి) జ్ఞానేశ్ కుమార్‌ను వెంటనే పదవి నుండి తొలగించాలి” అని అఖిల భారత రైతు-కూలీ సంఘం (AIKMS) పెద్దపల్లి జిల్లా కమిటీ డిమాండ్ చేసింది. సంయుక్త కిసాన్ మోర్చా (SKM) పిలుపులో భాగంగా శుక్రవారం జిల్లా కేంద్రంలోని అంబేద్కర్‌ విగ్రహం వద్ద నాయకులు, కార్యకర్తలు కళ్లకు నల్లగుడ్డలు కట్టుకుని వినూత్నంగా నిరసన కార్యక్రమం చేపట్టారు.

ఈ సందర్భంగా ఏఐకేఎంఎస్ జిల్లా అధ్యక్షుడు గుండేటి మల్లేశం, ఉపాధ్యక్షుడు మేరుగు చంద్రయ్యలు మాట్లాడారు. ఓటర్ల జాబితాలో అక్రమ “ఎస్.ఐ.ఆర్” విధానానికి వ్యతిరేకంగా, అలాగే ఢిల్లీలో నిరసన తెలుపుతున్న విద్యార్థులు, యువతపై పోలీసులు మరియు బిజెపి-ఆర్‌ఎస్‌ఎస్‌ శక్తులు జరిపిన దాడులను తీవ్రంగా ఖండిస్తున్నామని తెలిపారు. బాధితులకు మరియు ప్రజా పోరాటాలకు మద్దతుగానే ఈ నిరసన చేపట్టినట్లు పేర్కొన్నారు.

నేతల ప్రధాన డిమాండ్లు:

ఎస్.ఐ.ఆర్ రద్దు: ఓటర్ల జాబితాలోని అక్రమ “ఎస్.ఐ.ఆర్” విధానాన్ని తక్షణమే రద్దు చేయాలి.
సిఇసి తొలిగింపు & విచారణ: ప్రధాన ఎన్నికల కమిషనర్ జ్ఞానేష్ కుమార్‌ను వెంటనే పదవి నుండి తొలగించి, ఆయనపై నిష్పక్షపాత విచారణ జరపాలి.
13.41 కోట్ల మందికి ఓటు హక్కు పునరుద్ధరణ: పారదర్శకత లేకుండా ఓటర్ల జాబితా నుండి తొలగించిన 13.41 కోట్ల మంది పౌరుల ఓటు హక్కును తక్షణమే పునరుద్ధరించాలి.
చట్టంలో సవరణలు: ఎన్నికల కమిషనర్ల నియామక ప్యానెల్‌లో క్యాబినెట్ మంత్రి స్థానంలో భారత ప్రధాన న్యాయమూర్తి (CJI)ని నియమించేలా ‘CEC మరియు ఇతర ECల చట్టం, 2023’కి సవరణలు చేయాలి.
సెక్షన్ 16 రద్దు: సుప్రీంకోర్టు లేదా హైకోర్టు న్యాయమూర్తుల కంటే విస్తృతమైన రక్షణ కల్పిస్తూ, పదవీ విరమణ తర్వాత కూడా సిఇసి, ఈసిలకు చట్టపరమైన రక్షణ నిచ్చే ‘సెక్షన్ 16’ను వెంటనే రద్దు చేయాలి.
దాడుల ఖండన: నిరసన తెలుపుతున్న విద్యార్థినులతో సహా ఆందోళనకారులపై సాగుతున్న హింసను ఆపాలి.

దేశంలో ప్రజాస్వామ్య వ్యవస్థను, రాజ్యాంగ హక్కులను పరిరక్షించుకోవడానికి రైతు-కూలీలు, సామాన్య ప్రజలందరూ క్రియాశీలకంగా ఏకం కావాలని ఈ సందర్భంగా నాయకులు పిలుపునిచ్చారు.

ఈ నిరసన కార్యక్రమంలో ఏఐకేఎంఎస్ జిల్లా నాయకులు మేరుగు చంద్రయ్య, గుండేటి మల్లేశం, కె. లింగమూర్తి, బోనాల లింగయ్య, ఎంబీ బాబా, తిర్రి బాలక్రిష్ణ, తూల్ల గట్టయ్య, ఎల్. శంకర్ తదితరులు పాల్గొన్నారు.

Generate ePaper Clip