మున్సిపల్ పోరులో అభ్యర్థుల భవితవ్యం తేలేది రేపే.. హాంగ్ దిశగా సర్వే పలితాలు…చైర్మన్ కుర్చీ ఎవరిని వరించునో..!

మండల యాదగిరి, స్వర్ణోదయం ప్రతినిధి
హుజురాబాద్ ఫిబ్రవరి 12:
పట్టణ ఓటరు నాడి ఎటువైపు? మున్సిపల్ పీఠంపై ఎగిరే జెండా ఏ పార్టీది? ఈ ప్రశ్నలకు మరికొన్ని గంటల్లో సమాధానం లభించనుంది. హుజురాబాద్ మున్సిపాలిటీ రెండో సాధారణ ఎన్నికల సమరం ఉత్కంఠ భరితమైన క్లైమాక్స్‌కు చేరుకుంది. బుధవారం జరిగిన పోలింగ్‌లో ఓటర్లు భారీగా తరలివచ్చి తమ ఓటు వేయగా, అభ్యర్థుల జాతకాలు ప్రస్తుతం బ్యాలెట్ బాక్సుల్లో నిక్షిప్తమై ఉన్నాయి.

కౌంటింగ్ కేంద్రం సిద్ధం: పరిశీలించిన కమిషనర్
స్థానిక ప్రభుత్వ జూనియర్ కళాశాలలో ఏర్పాటు చేసిన కౌంటింగ్ కేంద్రాన్ని మున్సిపల్ కమిషనర్ సయ్యద్ ముసాబ్ అహ్మద్ స్వయంగా సందర్శించారు. ఏర్పాట్లలో ఎలాంటి లోటుపాట్లు లేకుండా, అత్యంత పారదర్శకంగా లెక్కింపు ప్రక్రియను పూర్తి చేసేందుకు ఎన్నికల యంత్రాంగం అన్ని చర్యలు చేపట్టింది.
ఒక్క రౌండ్‌లోనే ఫలితం.. ప్రత్యేక ఏర్పాట్లు ఇవే!
లెక్కింపు ప్రక్రియను వేగవంతం చేసేందుకు అధికారులు పక్కా ప్లాన్ రూపొందించారు:

హాల్స్ & టేబుల్స్: మొత్తం 5 హాల్స్, 30 టేబుళ్లపై ఏకకాలంలో ఓట్ల లెక్కింపు సాగనుంది.
సిబ్బంది: 30 మంది సూపర్‌వైజర్లు, 60 మంది అసిస్టెంట్లు, మైక్రో అబ్జర్వర్లు విధుల్లో పాల్గొంటున్నారు.
ఏకైక రౌండ్: సమయాన్ని ఆదా చేసేలా కేవలం ఒక్క రౌండ్‌లోనే పూర్తి ఫలితాలు వెలువడేలా కసరత్తు చేశారు.
నిఘా నీడలో లెక్కింపు.. 144 సెక్షన్ అమలు
కౌంటింగ్ కేంద్రం చుట్టూ పోలీసులు భారీ బందోబస్తును ఏర్పాటు చేశారు. ఇప్పటికే పట్టణంలో 144 సెక్షన్ అమలులో ఉంది.
గుర్తింపు కార్డులు ఉన్న ఏజెంట్లకు మాత్రమే కేంద్రంలోకి అనుమతి ఉంటుంది. అభ్యర్థులు, ఏజెంట్లు నిర్ణీత సమయానికే కేంద్రానికి చేరుకోవాలని అధికారులు సూచించారు.
మధ్యాహ్నానికే క్లారిటీ!
శుక్రవారం ఉదయం 8 గంటలకు లెక్కింపు ప్రారంభం కానుండగా.. మధ్యాహ్నం లోపే హుజురాబాద్ మున్సిపాలిటీపై ఏ పార్టీ జెండా ఎగురుతుందో స్పష్టత రానుంది. గెలుపుపై అటు అధికార, ఇటు ప్రతిపక్ష పార్టీలు ధీమా వ్యక్తం చేస్తున్నాయి.